တစ်လကို ငွေကျပ်တစ်သိန်း သွင်းယုံဖြင့် အိမ်ရာပိုင်မယ့် စီမံကိန်းကြီး စတော့မည်

အနှစ် ၂၀ အရစ်ကျ ပေးသွင်းရုံဖြင့် အလုပ်သမားများ အိမ်ပိုင်ဆိုင်နိုင်မည့် စီမံကိန်းကို ရန်ကုန်၊ မန္တလေး၊ ပုသိမ်စသော မြို့များတွင် အကောင်အထည် ဖော်သွားမည်ဟု ပြည်ထောင်စုဝန်ကြီး ဦးစိုးသိန်းက ပြောသည်။  ''အဲဒီ စီမံကိန်းတွေကို ၂၀၁၅ မတိုင်မီ တစ်ဆင့်ပြီးတစ်ဆင့် အကောင်အထည် ဖော်သွားမယ်'' ဟု အထက်ပါ ပုဂ္ဂိုလ်က ဆိုသည်။ လက်ရှိတွင် ဖေဖော်ဝါရီမှ စတင်ကာ ရန်ကုန် သာကေတရှိ နိုင်ငံတော်ပိုင် ဆိပ်ကမ်းနယ်မြေတွင် ၁၈ ထပ် တိုက် ၆၄ လုံး၊ အခန်းပေါင်း ၁၇၄၀၀ ခန့် ပါဝင်သော စီမံကိန်းကို ပြည်တွင်းကုမ္ပဏီ ၂၀ အား စတင်တည်ဆောက်စေမည်ဟု ပြည်ထောင်စု ဝန်ကြီးက ပြောသည်။ ''အစိုးရက မြေအလကား ပေးမှာပေါ့ဗျာ၊ ဒါပြီးရင် လမ်း ၅၀ တို့၊ အရင် လင့်လမ်းတို့မှာရှိတဲ့ အိမ်အို၊ အိမ်ဟောင်းတွေမှာလည်း ညှိနှိုင်းပြီး အထပ်မြင့်ဆောက်မယ်။ ပြီးရင် ဒါတွေမှာလည်း အရစ်ကျ ဝယ်ယူနိုင်ဖို့ လုပ်သွားမယ်''ဟု ၎င်းက ဆက်လက်ပြောသည်။


ရန်ကုန်မြို့၌ စီမံကိန်းအရ အရစ်ကျ ဝယ်ယူနိုင်မည့် အိမ်ရာများအား တည်ဆောက်ပြီးပါက ရန်ကုန်တိုင်းဒေသကြီး အစိုးရအဖွဲ့သို့ လွှဲအပ်ကာ အရစ်ကျ ဝယ်ယူနိုင်မည် ဖြစ်သည်ဟု သမ္မတရုံး ဝန်ကြီးဌာနမှ သိရသည်။ ''ရန်ကုန်မှာ ဝန်ထမ်း ၄၀၀၀၀ လောက် အိမ်ပိုင်ဆိုင်အောင် လုပ်သွားမယ်။ လတ်တလော အရစ်ကျ ငွေကို ကျပ်တစ်သိန်းလောက် ပေးသွင်းနိုင်ဖို့ လုပ်ထားတယ်။ ဒီပမာဏ မတတ်နိုင်လည်း တစ်မျိုးပေါ့ကွာ'' ဟု ဦးစိုးသိန်းက ထပ်မံပြောသည်။ နိုင်ငံတော်က နှစ်ရှည်ချေးငွေဖြင့် ထုတ်ချေးမည့် ငွေကြေးဖြင့်ပင် ရန်ကုန် အပါအဝင် မန္တလေး၊ ပုသိမ်၊ မော်လမြိုင်ကဲ့သို့သော မြို့ကြီးများ၌ပါ ဆက်လက် အကောင်အထည် ဖော်သွားမည်ဖြစ်ပြီး လိုအပ်ပါက စင်ကာပူကဲ့သို့သော ပြည်ပနိုင်ငံမှ ကုမ္ပဏီများ ဖိတ်ခေါ်၍ တည်ဆောက်ခိုင်းမည်ဟု သမ္မတရုံးမှ သိရသည်။

ထို့အပြင် မြို့ရွာနှင့် အိုးအိမ် ဖွံ့ဖြိုးရေး ဦးစီးဌာနမှ မြန်မာနိုင်ငံ အနှံ့အပြားတွင် အိမ်ခန်းပေါင်း တစ်သန်း တည်ဆောက်နိုင်ရေးကို နှစ်နှစ်ဆယ် စီမံကိန်းဖြင့် အကောင်အထည်ဖော် ဆောင်ရွက်နေပြီး ၂၀၁၁ ခုနှစ်အား စီမံကိန်း စတင်သည့် နှစ်အဖြစ် သတ်မှတ်ထား၍ ၂၀၃၁ ခုနှစ်တွင် အိမ်ခန်းပေါင်း တစ်သန်းအပြီး တည်ဆောက်သွားမည်ဖြစ်ကြောင်း သိရသည်။ အိမ်ခန်းပေါင်း တစ်သန်း တည်ဆောက်နိုင်ရေးအတွက် မြို့ရွာနှင့် အိုးအိမ် ဖွံ့ဖြိုးရေး ဦးစီးဌာနအပြင် ရန်ကုန်စည်ပင်၊ မန္တလေးစည်ပင် စသည့် ဌာနပေါင်းစုံမှ ကြိုးပမ်း ဆောင်ရွက်မည်ဖြစ်ပြီး လက်ရှိတွင် မြို့ရွာနှင့် အိုးအိမ်ဖွံ့ဖြိုးရေး ဦးစီးဌာနမှ ဒဂုံဆိပ်ကမ်းတွင် အိမ်ခန်းပေါင်း နှစ်သောင်းဝန်းကျင် အကောင်အထည် ဖော်နိုင်ရေး ကြိုးပမ်းလျက် ရှိသည်ဟု အဆိုပါ ဌာနမှ (မြို့ပြနှင့် ဒေသစီမံကိန်းဌာနခွဲ) ဒုတိယ ညွှန်ကြားရေးမှူး ဒေါ်အေးအေးမြင့်က ပြောသည်။

နှစ်နှစ်ဆယ် စီမံကိန်းကို ငါးနှစ်ကာလစီ ပိုင်းဖြတ်၍ ဆောင်ရွက်သွားမည်ဖြစ်ပြီး ပထမငါးနှစ်တွင် အိမ်ခန်းပေါင်းတစ်သိန်း တည်ဆောက်သွားမည်ဟု ၎င်းထံမှ သိရသည်။ ရန်ကုန်မြို့၌ အိမ်ရာစီမံကိန်း လေးခုကို စီမံကိန်းပထမ ငါးနှစ်၏ နောက်ဆုံးနှစ်ဖြစ်သော ၂၀၁၅ တွင် အပြီးတည်ဆောက်နိုင်ရန် ရန်ကုန်စည်ပင်မှ ကန်ထရိုက်ခေါ်ယူထားကြောင်း သိရသည်။ ရန်ကုန်စည်ပင်မှ ဒဂုံမြို့သစ် မြောက်ပိုင်းမြို့နယ် ဗိုလ်ဗထူးလမ်းတွင် ဗိုလ်ဗထူးအိမ်ရာ စီမံကိန်း၊ ဗိုလ်မင်းရောင်လမ်းတွင် ဗိုလ်မင်းရောင်အိမ်ရာ စီမံကိန်း၊ ဒဂုံမြို့သစ် တောင်ပိုင်းမြို့နယ် ဧရာဝဏ်လမ်းနှင့် ပြည်ထောင်စုလမ်းတွင် ဧရာဝဏ် အိမ်ရာစီမံကိန်းနှင့် ဒဂုံမြို့သစ် အရှေ့ပိုင်းမြို့နယ် မင်းရဲကျော်စွာလမ်းတွင် မင်းရဲကျော်စွာ အိမ်ရာ စီမံကိန်းတို့ကို ၂၀၁၅ ခုနှစ်အပြီး တည်ဆောက်ရန် လျာထားကြောင်း သိရသည်။

ယင်းအပြင် မြို့ရွာနှင့် အိုးအိမ် ဖွံ့ဖြိုးရေး ဦးစီးဌာနမှ တိုင်းဒေသကြီးနှင့် ပြည်နယ် အသီးသီးတွင် အစိုးရဝန်ထမ်းများအား ဦးစားပေး စနစ်ဖြင့် အငှားချ အိမ်ရာများ တည်ဆောက်ပေးနိုင်ရေးအတွက် အစီအစဉ်များ ရေးဆွဲနေကြောင်း သိရသည်။ ဆောက်လုပ်ရေး ဝန်ကြီးဌာနက ဒဂုံဆိပ်ကမ်း မြို့နယ်တွင် ဧရာဝဏ်နှင့် ရတနာအိမ်ရာ စီမံကိန်းတို့ တည်ဆောက်ရန် မကြာမီ တင်ဒါခေါ်သွားမည် ဖြစ်ပြီး တစ်ခန်း၏ တန်ဖိုးကို ကျပ်သိန်းတစ်ရာမှ တစ်ရာ့ငါးဆယ်အတွင်း တွက်ချက်ထားသည်ဟု သိရသည်။ ထို့အပြင် ဆောက်လုပ်ရေး ဝန်ကြီးဌာနက တည်ဆောက်သော တန်ဖိုးနည်း တိုက်ခန်းများကို အခြေခံ လစာနည်းသော အစိုးရဝန်ထမ်းများ၊ လစာနည်း ကုမ္ပဏီ ဝန်ထမ်းများအပြင် သာမန် ပြည်သူများပါ ဝယ်ယူနိုင်မည်ဟု ထုတ်ဖော် ပြောဆိုခဲ့သည်။ 
news.yatanarpon.com.mm

Posted in: ပြည်တွင်းသတင်း